94. நன்றியுணர்வோடு இருங்கள் ...🔗

நண்பர்களோடு பிக்னிக் செல்ல நூறு டாலர் தர வேண்டுமென வெகு உருக்கத்தோடு ஜானி வேண்டிக் கொண்டான். மேலும், தன்னுடைய முகவரியைச் சப்தமாகக் கடவுளிடம் சொல்லி வீட்டுக்குப் பணம் அனுப்பும்படி உரிமையோடு சொன்னான்.

“இன்னும் ஏன் அனுப்பவில்லை?” என மறுநாள் ஆலயம் வந்தவன், கடவுளிடம் கோபித்துக் கொண்டான்.

ஜானியின் செயலை ரசித்த மதபோதகர் தன் பணத்திலிருந்து ஐம்பது டாலரை ஜானி வீட்டுக்கு “இப்படிக்கு - கடவுள்” என எழுதி மணியார்டர் செய்தார்.

அடுத்த நாள் மாலை, ஆலயத்திற்கு வந்த ஜானி கடுகடுப்போடு கடவுளிடம் சொன்னான், “அடுத்த முறை பணம் அனுப்பும்போது மணியார்டர் மூலமாக அனுப்ப வேண்டாம். அந்த போஸ்ட் ஆபீஸில் ஐம்பது டாலரை லஞ்சமாக எடுத்துக் கொண்டு, ஐம்பது டாலர் மட்டுமே எனக்கு அனுப்பினார்கள்”.

சீன பல்கலைக்கழகமொன்றில் 'எது மாபெருஞ்செல்வம்?' என்ற தலைப்பில் நடந்த கருத்தரங்கிற்கு வந்திருந்த தாவோ சொற்பொழிவாளரைத் தீர்பளிக்கும்படி கேட்டுக்கொள்ளப்பட்ட போது, "தம்மிடம் இருப்பதைக் கொண்டு திருப்தியடையும் பக்குவத்தை விட பெரிய செல்வம் இவ்வுலகில் இல்லை. இப்படிப்பட்டவர், செல்வச்சீமானை விட பல மடங்கு திருப்தியோடிருப்பார்" என்றார்.

தாய் மகனிடம், "பிளம் கேக்கை திருடிச் சாப்பிட்டாயா?" என வெகு கோபத்தோடு கேட்டார்.

மகன் "ஆமாம். சாப்பிட்டேன்" என்றான் எந்த தடுமாற்றமும் இல்லாமல்,

"நீ அந்த கேக்கைத் திருடும்போது கூட, கடவுள் அங்கேதான் இருந்தார் என்ற விஷயம் உனக்குத் தெரியுமா?" எனக் கேட்டு, தன் மகன் குற்றம் செய்திருப்பதைச் சுட்டிக் காட்ட முயற்சித்தார்.

"ம்ம்..... தெரியும்" என்றான் மகன் வெகு இயல்பாக. தாய்க்கு மகனின் பதில்கள் மேலும் மேலும் எரிச்சலைத் தந்தது...

"நீ என்ன செய்தாலும், உன்னைக் கடவுள் கவனிக்கிறார் என்பது தெரியுமா?"

"ம்... ம்... தெரியுமம்மா"

"நீ திருடும்போது உன் செயலைப் பார்த்து அவர் என்ன சொல்லிக் கொண்டிருந்தார் என்று உனக்குத் தெரியுமா" எனக் கேட்டதற்கு,

மகன் "கிசுகிசுவென மெல்ல கடவுள் சொன்னார்... சமையலறையில் நம் இருவர் மட்டும்தான் இருக்கிறோம். அதனால், பயப்படாதே. எனக்கும் சேர்த்து இரண்டு பிளம் கேக்காக எடுத்துக் கொள் என்றார்!" எனச் சொன்னான்.

பொய் சொன்னதால் வாய் அடைத்து நின்றார். எது மெய்? எது பொய்? என இங்கு தீர்ப்பிட முடியுமா...