மௌன பிந்து🔗

இதுவொரு 'கேட்கும் தியானம்'.

கேட்கும் தியானங்கள் அடக்கமான தியானங்கள். நீங்கள் எதையுமே செய்ய வேண்டியதில்லை - சும்மா கேட்டுக்கொண்டிருந்தால் போதும்.

ஆனால் கேட்பதால் நிறையப் பலன் விளையும்! நாம் வாழ்வது ஒலிகளின் புயல் நடுவே.

எப்போதும் ஒலிகள் வந்து நம்மைத் தாக்கிக் கொண்டே இருக்கின்றன. நம்மை நசுக்குகின்றன. நம்மை விழுங்கி விடுகின்றன.

அந்தப் புயலில் நாம் காணாமல் போய் விடுகிறோம். ஆனால் அந்தப் புயலின் நடுவே, நாம் கேள்விப்பட்டிராத ஒரு மௌனம் இருக்கிறது. அந்த நிசப்தத்தை இந்தத் தியானம் நம்மை உணரச் செய்கிறது.

எங்கு வேண்டுமானாலும் சரி, அமர்ந்து கொள்ளுங்கள்.

அந்த இடத்தில் அவ்வளவு இரைச்சல் அதிகமாக இருக்கிறதோ அவ்வளவு நல்லது! ஓசை தொடர்ந்து கேட்கும் இடமாகத் தேர்ந்தெடுத்துக் கொள்ளுங்கள். அது இயற்கை ஓசையாக இருந்தால் நல்லது.

அமைதியாக இருங்கள்.

உங்களை நோக்கி, பல திசைகளிலிருந்தும் அலை அலையாக வரும் ஒலிகளை உணருங்கள்.

எல்லாப் பக்கங்களிலிருந்தும் ஒலிகள் பாய, அந்த ஒலிப் புயலின் நடுவே இருப்பதாக உணருங்கள்.

நீங்கள் மையத்தில் இருக்கிறீர்கள்.

ஒலிகளோ உங்களை நோக்கிப் பாய்கின்றன.

நீங்கள் இருக்கும் மையத்தில், ஓசையே இல்லையென்று உணருங்கள்! மையத்தில் முழு நிசப்தம்.

மையத்தில் ஓசைகள் இருந்தால் உங்களால் வெளி ஓசைகளைக் கேட்க முடியாது. புற ஓசைகள் உங்களுக்குள் புகுந்து ஊடுருவிச் செல்கின்றன. ஆனால் அவை மையத்தை அடையும்போது நின்று விடுகின்றன.

உங்களுக்குள் ஓர் இடம் இருக்கிறது. அங்கே எல்லா ஓசைகளும் நின்றுவிடும். அந்த இடத்திலிருந்துதான் நாம் ஒவ்வொரு ஓசையையும் கேட்கிறோம். அந்த இடத்தை கண்டுகொள்ள முயற்சி செய்யுங்கள்.

அது, சட்டென உங்கள் விழிப்புணர்வை உள்முகமாகத் திரும்பிவிடும்.

உங்கள் விழிப்புணர்வு வெளியுலகத்திலிருந்து இடம் மாறுகிறது. எங்கு நிசப்தம் நிலவுகிறதோ. அதுதான் உங்கள் மையம். எந்த ஓசையும் புக முடியாத ஒரு புள்ளி இருக்கிறது. அந்தப் புள்ளிதான் நீங்கள்.

ஒருமுறை அந்த நிசப்தத்தை நீங்கள் அனுபவித்து விட்டால் பிறகு எந்த ஓசையாலும் உங்களை இடையூறு செய்ய முடியாது. எதனாலும் உங்களைத் தொடவும் முடியாது.

நாம் நம் காதுகளால் ஒலிகளைக் கேட்பதாக நினைத்துக் கொண்டிருக்கிறோம். இந்த உத்தியின் மூலம் ஒலிகள் காதுகளாலோ, தலையாலோ கேட்கப்படுவன அல்ல என்பதை உணரலாம்.

நாபி மையம்தான் ஒலிகளை எப்போதும் கேட்டுக் கொண்டிருக்கும் மையம் ! அதுதான் ஒலிகளின் மையம்.

ஒலிகளை ஏன் அதிக முக்கியத்துவம் கொண்டதாகப் பேசுகிறோம்? ஏனென்றால், அதிகப்படியான ஓசை, உங்கள் செவிகளைக் குத்தித் துளையிடுவதற்கு ஒப்பாகும்! ஒரு ஒலி அர்த்தமற்றதாகத் தோன்றுமானால், அது தொடர்ந்து ஒலித்தால், ஒலிகளைத் தனித்தனியாக அடையாளம் காண முடியவில்லை என்றால், அந்த ஒலியே ஒரு பெரிய தடையாகிவிடும்.

பாடல்கள் கொண்டு இந்த முறையில் தியானம் செய்ய முடியாது. காரணம், பாடல் உங்களுக்கு விளங்கும்;

பொருளின் மீது கவனம் குவியும்.

உடனே மூளையைப் பயன்படுத்த ஆரம்பித்து விடுவீர்கள். அதனால் அது வெறும் ஓசையாக இருக்க வேண்டும்.

ஓசை நடுவே, விரல்கள் கொண்டு காதை அடைத்துப் பாருங்கள். ஒரு புதிய ஓசையைக் கேட்பீர்கள்.

அதுதான் ஓசையில்லா ஓசை.

இந்தப் புதிய ஓசை. ஓசை இல்லாமையின் ஓசை, அப்படிப்பட்ட ஒருஓசை இருக்கவே செய்கிறது. அதை நீங்கள் எளிதாகக் கேட்கவும் முடியும்!

ஒலியின் மூலம், நாம் ஒலியின் மூலத்தை நோக்கிச் செல்கிறோம். ஓசையின்மை மூலம், நாம் உள்நோக்கி நமது மையத்தை நோக்கிச் செல்கிறோம்.

உலகின புற ஓசைகள்,

மையத்தில் உள்ள ஓசையில்லா ஓசை,

இந்த இரண்டையும் கேட்கக் கற்றுக் கொள்ளுங்கள்.

ஒன்றிலிருந்து இன்னொன்றை நோக்கி நகருங்கள்.

வெளியிலிருந்து உள் நோக்கி நகருங்கள். பிறகு மறுபடியும் திரும்பி வரக் கற்றுக்கொள்ளுங்கள்.

ஒவ்வொரு முறையும் உங்கள் உள்வாங்கும் திறன் கூர்மைப்படும்; அதிகரிக்கும்.

அகத்திற்கும், புறத்திற்குமாக எளிதாக நகர்ந்து செல்லக் கற்றுக் கொள்ளுங்கள். அப்போது தெரியும் அந்த விளையாட்டு எப்படிப்பட்டதென்று!