அந்தரத் தியானம்🔗

இந்தத் தியான முறையைப் பற்றி :

நினைவிற்கெட்டாத பழங்காலம் முதலே, ''கண்களை மூடு! உன் உண்மை இயல்பை உள்ளே பார்!'' என்றுதான் சொல்லி வந்திருக்கிறார்கள்.

சிவன் தேவிக்குச் சொன்ன, தந்திர சாஸ்திரம் இதுதான். இது தியான முறைகளின் களஞ்சியம்.

இதில் கண்கள் மிக (இரண்டு வகையில்) முக்கியமான பங்கு வகிக்கின்றன. அவை திறந்திருக்கும்போது, உலகத்துச் செய்திகளையெல்லாம் உங்களுக்குத் தெரிவிக்கும் தூதுவர்கள் ; அவை மூடி விட்டால், அவையே உள்உலகத்தின் காட்சி களை காட்ட ஆரம்பிக்கின்றன.

கண்களை மூடுவது என்பது, இமைகளை மூடுவதல்ல! கண்களை மூடச் சொல்லும்போது, நாம் இயல்பாக இமைகளைத்தான் மூடுகிறோம்.

மூடிய விழிகளுக்குள்ளும் வெளியுலக உருவங்களையே நாம் தொடர்ந்து பார்க்கிறோம். வெளியில் உள்ள தொலைக்காட்சியை அணைத்துவிட்டு. உள்ளே உள்ள தொலைக்காட்சியைப் போட்டு விடுகிறோம்! அப்போது நம் கண்கள் மூடவே இல்லை என்று பொருள்.

கண்களை அசையாமல் இருக்கச் செய்ய ஒரு சிறந்த வழி இருக்கிறது. உங்கள் கண்களின் கருவிழிகள் கல்லாக மாறிவிட்டதாகக் கற்பனை செய்துக்கொள்ளுங்கள். கருவிழிகள் இருக்கும் இடத்தில், இரண்டு பளபளப்பான கருப்பு உருண்டைக் கற்கள்! கற்பனை செய்து பாருங்கள்.

அப்படி செய்தவுடனே, உங்கள் விழியசைவு மட்டுமல்ல, எண்ணங்களும் நின்றுபோவதைக் காணலாம்! விழியசைவு நின்றால், எண்ணங்களின் போக்கு மெல்ல நிதானப்படும்.

கண்களை மூடிக்கொண்டு, கருவிழிகள் கல்லாய்ப்போனதாகக் கற்பனை செய்து கொள்ளுங்கள். வேறு எதுவும் செய்ய வேண்டாம்.

அதே நிலையில் இருங்கள்.

இது எளிதான காரியமல்ல. அந்த நிலையில் சில நிமிடங்கள் இருப்பதற்கும் கூடப் பல வாரங்கள் பயிற்சி செய்ய வேண்டி வரும். ஆனால் அதற்கான பலன் உண்டு - காரணம், அப்போதுதான் நீங்கள் முதன்முதலாக உள்ளே பார்க்க ஆரம்பிக்கிறீர்கள்.

நீங்கள் உங்கள் உடலை உள்ளிருந்து பார்த்ததே இல்லை.

இப்போது, ஒவ்வொரு உறுப்பையும் உள்ளிருந்து காண முயற்சி செய்யுங்கள். உங்கள் கையை அசைத்தால், அது உள்ளிருந்து பார்க்கும் அனுபவமாகவே உங்களுக்குத் தென்படும். இதுவரை அது வெளியிலிருந்து பார்க்கும் அனுபவமாகவே இருந்து வந்தது. உங்கள் உடலினுள் ஒரு உள் பயணம் செய்து பாருங்கள்.

கை விரலின் முனையிலிருந்து தொடங்குங்கள். மிகுந்த விழிப்போடு செய்ய வேண்டும். கை விரல் முனை தவிர வேறு எந்த நினைவும் இருக்கக்கூடாது!

பிறகு நினைவை மெல்ல கை, தோள் என மேலே கொண்டு வாருங்கள். உங்கள் உடலின் ஒவ்வொரு பகுதியிலும் அளவு கடந்த உணர்வை நீங்கள் அனுபவிப்பீர்கள்.

உங்கள் உடலை உள்ளிருந்து அனுபவிக்கும்போது, 'நீங்கள் ஓர் உடல் அல்ல' என்ற உணர்வை இயல்பாகவே பெற்று விடுவீர்கள்.

உங்கள் உடலையே நீங்கள் ஒரு பார்வையாளராக இருந்து பார்க்கும்போது, நீங்கள் எவ்வாறு ஓர் உடலாக இருக்க முடியும்?

நீங்கள் ஒரு உடல் என்ற மாயையிலிருந்த நீங்கள் விடுபட்டு விடுவீர்கள். உங்கள் உடலுடனான உங்களது அடையாளத்தை நீங்கள் இழந்து விடுவீர்கள்.

இப்போது நீங்கள் எளிதாக ஆழமாகச் செல்ல முடியும். உங்கள் மனத்தின் அடியாழத்திற்குச் செல்ல முடியும். உங்கள் மனத்தைப் பார்க்க ஆரம்பிக்க முடியும், அது எளிதல்லதான்.

ஆரம்பத்தில், எல்லாவற்றையும் நீங்கள் பார்ப்பது உங்கள் தலைக்குள்தான். ஆனால் அது உங்கள் மனமல்லவே! உங்கள் மனம், மூளையிலிருந்து வேறுபட்டது.

நீங்கள் பொதுவாக உங்கள் மனத்தை எப்படி கற்பனை செய்து வைத்திருக்கிறீர்கள் என்று நினைத்துப் பாருங்கள். அதை வெளியிலிருந்து பாருங்கள். இப்போது, முறையைத் தலைகீழாக மாற்றுங்கள். மனத்திற்குள் நுழைந்து, அதை உள்ளிருந்து பாருங்கள்.

தொடர் பயிற்சியில், எல்லாம் நிகழ்ந்துவிடும். உங்கள் உடலைப்போலவே, நீங்கள் மனத்திலிருந்தும் வேறுபட்டவர் என்பதைக் காணலாம். நீங்கள் பார்வையாளர் மட்டுமே.

நீங்கள், உங்கள் உடலுமல்ல ; மனமுமல்ல என்றால்

இரண்டின் பார்வையாளர் நீங்கள்.

அதுதான் உங்களது உண்மையான சுயம. உங்களது உண்மையான சுயத்தை உங்களால் பார்க்க முடியாது. காரணம் நீங்கள் அதற்கு வெளியே இல்லை. உன்னால் காண முடியாததே 'நீங்கள்'.

இந்த முறைகளில் பயிற்சி மேற்கொள்ளும்போது, பொறுமை வேண்டும்.

முதல் நாளன்றே உங்கள் முன்னால், அற்புதங்கள் குதித்து வந்துவிடாது. மனமொடிந்து போய் விடாதீர்கள்.

அனுபவம் ஏற்பட, ஏற்பட செய்த முயற்சிகளுக்கெல்லாம் பயன் கிடைத்துவிட்டதாகப் பொருள். அது, உங்களுக்குள் ஒரு நிரந்தர மாற்றத்தை ஏற்படுத்தி விடும்.

அதற்குத் தயாராக இருங்கள்!