ஆத்ம ஸ்புரணா🔗

இந்தத் தியான முறையைப் பற்றி :

ஒவ்வொரு கணத்திலும், நம்முடைய ஒவ்வொரு அசைவையும் கவனத்தில் கொள்ளச் செய்யும் தியானம் இது.

இது தந்திர சாஸ்திரத்தில் இருக்கும் ஒரு தியான முறையாகும். மகா குருவான குர்ட்ஜியெஃப், இதனை மேலை நாடெங்கிலும் பிரபலப்படுத்தினார்.

செயல்முறை விளக்கம் :

உண்ணும் போதும், பருகும்போதும், நடக்கும்போதும், பேசும்போதும் உங்களை நீங்கள் நினைவு கொண்டிருந்தால் போதும்.

நாம் நம்மைப் பற்றியதான உணர்வை, சில வினாடிகளுக்கு மேல் நீடித்து வைத்திருக்க முடியாது. உடனே மறந்து விடுவோம்.

நீங்கள் நினைத்துக் கொண்டிருப்பதாகத்தான் நினைப்பீர்கள். ஆனால் உங்கள் மனம் வேறொரு சிந்தனைக்குத் தாவி விடும்!

சுய நினைவு என்பது, நினைப்பது அன்று. அதாவது, சிந்திப்பது அன்று.

அது சுய விழிப்புணர்வு. 'நான் இருக்கிறேன்' என்று நினைவு வந்தாலே, முக்கிய அம்சத்தை நீங்கள் இழந்து விட்டீர்கள் என்று அர்த்தம்.

அதைத்தான் நாம் செய்து கொண்டிருக்கிறோம். 'நான் இருக்கிறேன்' என்ற சொற்களையே திரும்பத் திரும்ப நினைக்கிறோம்.

சொற்கள் அனுபவம் ஆகாது.

அதைச் சொல் வடிவமாக மாற்றாதீர்கள். இயல்பாக உணருங்கள், 'நான் இருக்கிறேன்' என்று அதைப் பற்றி நினைத்துக் கொண்டிருக்க வேண்டாம். 'நான் இருக்கிறேன்' என்பதை உணருங்கள்.

நீங்கள் செய்யவேண்டியதெல்லாம் ஒன்றே ஒன்றுதான், நடந்து செல்லும்போது. ஒரு கணம் நின்று, நீங்கள் இருப்பதை உணருங்கள். இந்த விழிப்புணர்வு தொடரட்டும். வெயில் உங்கள் முகத்தின்மேல் விழுவதையும் காற்று உங்கள் கூந்தலைக் கோதுவதையும் உணருங்கள்.

இந்த அனுபவங்களை உங்கள் உள்ளிருந்து அனுபவிக்கும் அந்த உண்மையான உங்களை 'நான்' என்று வெறுமனே உணருங்கள்.

ஒரு கணத்தில் நீங்கள் உங்களுக்குள் தூக்கி எறியப்படுவீர்கள்! அப்போது, ஆழ்ந்த மௌனத்தையும், எதார்த்த நிலையையும் 'பளிச்' எனப் பற்றிக் கொள்வீர்கள்.

அது சொல் கடந்தது. அனுபவித்தே உணர முடியும். ஒன்றைத் தொடும்போது, . அந்தத் தொடுதலை வெறுமனே உணருங்கள், தொட்டவரையும் உணருங்கள். இதனால் உங்கள் விழிப்புணர்வு மேலும் கூர்மையுடையதாக ஆகும்.

அந்த விழிப்புணர்வை, எல்லா நேரங்களிலும் உணருங்கள்.

உண்மையில் பார்ககப்போனால், இதை எல்லா நேரத்திலும் செய்யும் தியானமாக ஆக்கிக் கொள்ளுங்கள்.