ಜೀವನ್ಮುಕ್ತಿಯ ಸ್ಪರ್ಶವನ್ನು ಅನುಭವಿಸಿರಿ🔗

ಈ ಇಡೀ ಜಗತ್ತು ವಿಶ್ವಶಕ್ತಿಯ ದೈವಲೀಲೆಯಲ್ಲದೆ ಬೇರೇನೂ ಅಲ್ಲವೆಂದು ಹೇಳುವ ಜನರ ಗುಂಪೊಂದು ಯಾವಾಗಲೂ ಇದೆ. ಆದರೆ, ಈ ಇಡೀ ಜಗತ್ತು ಒಂದು ಆಕಸ್ಮಿಕ ಹಾಗೂ ಅದರ ಹಿಂದೆ ಯಾವ ಚೈತನ್ಯವೂ, ಬುದ್ಧಿಶಕ್ತಿಯೂ ಇಲ್ಲವೆಂದು ಹೇಳುವ ಮತ್ತೊಂದು ಗುಂಪಿದೆ. ಎರಡನೆಯ ಗುಂಪು ತಮ್ಮ ತತ್ತ್ವವನ್ನು ಬಹಳ ಅನುಕೂಲಕರವಾಗಿ ತಮ್ಮ ಸ್ವಂತಕ್ಕೆ ಬಳಸಿಕೊಂಡು ಜಗತ್ತನ್ನು ನಾಶಪಡಿಸಲು ಅನೇಕ ಶಸ್ತ್ರಾಸ್ತ್ರಗಳನ್ನು ತಯಾರಿಸುತ್ತದೆ. ಅವರು ಈ ಜಗತ್ತು ಹಾಗೂ ಇದರ ಆಗುಹೋಗುಗಳು ಆಕಸ್ಮಿಕವೆಂಬ ವಿಚಾರದಿಂದಲೇ ಜಗತ್ತಿನ ಯಾವುದರ ಬಗ್ಗೆಯೂ

ಸಂವೇದನೆಯನ್ನು ಬೆಳೆಸಿಕೊಳ್ಳುವುದೇ ಇಲ್ಲ. ಅವರು ಸ್ಥ candies ಮಟ್ಟದಲ್ಲಿಯೇ ಇರುವುದನ್ನೂ, ವಿಷಯಗಳನ್ನೂ ಗ್ರಹಿಸುವುದನ್ನೂ ಮುಂದುವರೆಸುತ್ತಾರೆ. ನೀವು ಮೊದಲ ಗುಂಪಿಗೆ ಸೇರಿದವರಾದರೆ, ಅಪ್ರಯತ್ನವಾಗಿಯೇ ನೀವು ಒಂದು ಸೂಕ್ಷ್ಮಮಟ್ಟದಲ್ಲಿದ್ದು, ಈ ವಿಶ್ವದ ಪ್ರತಿಯೊಂದು ಕಲ್ಲು, ಮರ, ಗಿಡ ಹಾಗೂ ಎಲ್ಲದರೊಂದಿಗೂ ಒಂದು ಆಳವಾದ ಗೌರವವನ್ನು ಬೆಳೆಸಿಕೊಳ್ಳುತ್ತೀರಿ. ನಿಮ್ಮೊಳಗೆ ಒಂದು ಆಳವಾದ ಭಕ್ತಿ ಉಕ್ಕುತ್ತದೆ. ನಿಮ್ಮ ಜೀವನವೇ ಒಬ್ಬ ಕಡಲ ಅಲೆಯ ಸವಾರನು ವಿಶ್ವಶಕ್ತಿಯ ಅಲೆಯ ಮೇಲೆ ಸವಾರಿ ಮಾಡುವಂತೆ ಸುಂದರವಾಗಿ ಹರಿಯುತ್ತದೆ.

ಈ ಇಡೀ ನಾಟಕವನ್ನು ಒಂದು ಅಗಾಧವಾದ ಹಾಗೂ ಆಳವಾದ ಬುದ್ಧಿಶಕ್ತಿಯು ನಡೆಸುತ್ತಿದೆ ಎಂಬ ಕಾರಣದಿಂದಲೇ ಮನುಷ್ಯನು ವಿಶ್ವಶಕ್ತಿಯ ನಾಟಕದೊಂದಿಗೆ ಸುಂದರವಾಗಿ, ಮಧುರವಾಗಿ, ಐಕ್ಯವಾಗಲು ಒಂದು ಜೀವನದ ರೀತಿಯನ್ನು ಸೃಷ್ಟಿಸಿಕೊಳ್ಳುವ ಸ್ಪಷ್ಟತೆಯನ್ನು ಪಡೆಯಲು ಸಾಧ್ಯವಾಗಿದೆ. ಇಡೀ ವಿಶ್ವಶಕ್ತಿಯು ನಿಮ್ಮ ಪ್ರತಿಯೊಂದು ಮಾತು, ಭಾವನೆ ಹಾಗೂ ಪ್ರಾರ್ಥನೆಗೆ ಸ್ಪಂದಿಸುವ ಒಂದು ಸಜೀವಿ. ಅದು ನಿಮ್ಮ ಪ್ರಜ್ಞೆಗೆ ಪ್ರತಿಕ್ಷಣವೂ ಜವಾಬ್ದಾರಿಯಿಂದ ಸ್ಪಂದಿಸುತ್ತದೆ. ನಿಮ್ಮೊಂದಿಗೆ ಸ್ಪಂದಿಸಲು ನೀವು ಕಾಣಬಹುದಾದ, ಕೇಳಬಹುದಾದ, ತಿಳಿಯಬಹುದಾದ ಜ್ಞಾನಿಗಳ ರೂಪವನ್ನು ಅದು ಆಗಾಗ್ಗೆ ಪಡೆದುಕೊಳ್ಳುತ್ತದೆ. ಒಂದು ಕಡಿಮೆ ವಾಯುಭಾರವಿರುವ ಪ್ರದೇಶದಲ್ಲಿ ಸಹಜವಾಗಿ ಒಂದು ಚಂಡಮಾರುತವು ಸೃಷ್ಟಿಯಾಗುವಂತೆ ಪ್ರಪಂಚದಾದ್ಯಂತದ ಕೋಟ್ಯಾಂತರ ಜನರ ಪ್ರಾರ್ಥನೆ ಹಾಗೂ ಅನ್ವೇಷಣೆಯು ಒಂದು ಅಸಾಧಾರಣ ಸೆಳೆತವನ್ನುಂಟುಮಾಡಿ, ಜ್ಞಾನಿಗಳು ಭೂಗ್ರಹದ ಮೇಲೆ ಅವತರಿಸುವುದಕ್ಕೆ ಕಾರಣವಾಗುತ್ತದೆ.

ಗುರುಗಳ ದರ್ಶನವು ವಿಶ್ವಶಕ್ತಿಯೆಂಬ ಸಾಗರದಲ್ಲಿ ಮೇಲೇಳುತ್ತಿರುವ ಒಂದು ದೊಡ್ಡ ಅಲೆಯಂತೆ. ಅಲೆಯು ಸಾಗರದಿಂದ ಬೇರ್ಪಡುವುದಿಲ್ಲ. ಆದರೆ ಅದೇ ಸಮಯದಲ್ಲಿ ಒಂದು ಅಸಾಧಾರಣ ಚಲನಾತ್ಮಕ ಶಕ್ತಿಯಾಗಿ ತನ್ನನ್ನೇ ವ್ಯಕ್ತಪಡಿಸಿಕೊಳ್ಳುತ್ತದೆ! ತಿಳಿಯಿರಿ: ಒಂದು ನದಿಯು ಸಾಗರಕ್ಕೆ ಸಂಬಂಧಿಸಿದೆಯಾದರೂ ಅದಕ್ಕೆ ಅಲೆಯ ಚಲನಾತ್ಮಕಶಕ್ತಿ ಇರುವುದಿಲ್ಲ. ಅದು ನಿಷ್ಕ್ರಿಯವಾಗಿ ಹರಿಯುತ್ತದೆ, ಅಷ್ಟೇ. ಆದರೆ ಆನಂದ ದರ್ಶನವು ವಿಶ್ವಶಕ್ತಿಯ ಆನಂದದ ಸಾಗರದಲ್ಲಿ ಮೇಲೇಳುವ ಸಕ್ರಿಯ ಅಲೆ. ಅದು ಒಂದು ಮಂಥನವನ್ನು ಸೃಷ್ಟಿಸಿ, ನಿಮ್ಮನ್ನು ಸಂಪೂರ್ಣವಾಗಿ ಬದಲಿಸಬಲ್ಲದು.

ಈಗ ಅಲೆಯಲ್ಲಿರುವ ಮರಳಿನ ಒಂದು ಕಣವನ್ನು ಊಹಿಸಿಕೊಳ್ಳಿರಿ. ಅದರಲ್ಲಿ ಅಶುದ್ಧತೆ ಏನಾದರೂ ಇರುತ್ತದೆಯೋ? ಇಲ್ಲ! ಅದು ಸಂಪೂರ್ಣವಾಗಿ ಶುದ್ಧವಾಗಿರುತ್ತದೆ. ಏಕೆಂದರೆ ಅದು ಚಲನಾತ್ಮಕ ಅಲೆಯೊಳಗಿರುತ್ತದೆ. ಅದೇ ರೀತಿ, ನೀವು ದರ್ಶನಕ್ಕೆ ಬಂದಾಗ ವ್ಯಕ್ತವಾಗುವ ಚಲನಾತ್ಮಕ ಶಕ್ತಿಯು ನಿಮ್ಮನ್ನು ಒಳಗೂ ಹೊರಗೂ ಸಂಪೂರ್ಣವಾಗಿ ಪಾವನಗೊಳಿಸುತ್ತದೆ. ದರ್ಶನದ ಸಮಯದಲ್ಲಿ ನೀವು ವಿಶ್ವಶಕ್ತಿಯ ಸೆಲೆಯೊಳಗೆ ಇರುತ್ತೀರಿ. ಸೂರ್ಯನ ಸಮಕ್ಷಮದಲ್ಲಿ ತಾವರೆಯು ಅರಳುತ್ತದೆ. ಅದೇ ರೀತಿ, ಗುರುಗಳ ಸನ್ನಿಧಿಯಲ್ಲಿ ನಿಮ್ಮ ಪ್ರಜ್ಞೆ ವಿಕಸಿಸುತ್ತದೆ.

ನೀವು ಮಾಡಬೇಕಾದುದೆಲ್ಲವೂ ಏನೆಂದರೆ, ಸಹಕರಿಸುವುದು. ವಾಸ್ತವವಾಗಿ ನೀವು ಸಹಕರಿಸದಿದ್ದರೂ, ಚೈತನ್ಯವು ಒಳನುಗ್ಗುತ್ತದೆ. ಅದು ಹೇಗೆ: ಅಲೆಯೊಳಗಿನ ಕಪ್ಪೆಚಿಪ್ಪು ಸಹಕರಿಸುತ್ತದೋ ಇಲ್ಲವೋ, ಅಲೆಯು ತನ್ನೊಂದಿಗೆ ಅದನ್ನು ಕೊಂಡೊಯ್ಯುತ್ತದೆ. ಅದೇ ರೀತಿ, ನೀವು ಸಹಕರಿಸಿದರೂ ಇಲ್ಲದಿದ್ದರೂ ಚೈತನ್ಯವು ನಿಮ್ಮನ್ನು ಆವರಿಸಿ, ಮಾಡಬೇಕಾದುದನ್ನು ಮಾಡುತ್ತದೆ. ಆದರೆ ಅಲೆಯೊಂದಿಗೆ ಸಹಕರಿಸುವ ಕಪ್ಪೆಚಿಪ್ಪು ಅಲೆಯ ಆನಂದದ ಚಲನೆಗಳೊಂದಿಗೆ ವಿನೋದವಾಗಿ ನರ್ತಿಸುತ್ತದೆ. ಅದು ಶುದ್ಧಗೊಂಡು ಕೊನೆಗೆ ಅಲೆಯಲ್ಲಿ ಲೀನವಾಗುತ್ತದೆ! ಆದರೆ ‘ನಿನ್ನನ್ನು ಅಷ್ಟು ಸುಲಭವಾಗಿ ನಂಬಲಾರೆ' ಎಂದು ಹೇಳಿ ಸುರಕ್ಷತೆಗಾಗಿ ತನ್ನ ಸುತ್ತಲೂ ಸಣ್ಣ ಕಲ್ಲುಗಳಿಂದ ಒಂದು ಗೋಡೆಯನ್ನು ನಿರ್ಮಿಸಿಕೊಳ್ಳುವ ಕಪ್ಪೆಚಿಪ್ಪು ಪ್ರತಿರೋಧವನ್ನು ಅನುಭವಿಸುತ್ತದೆ. ಆದರೆ ಕೇವಲ ಶಕ್ತಿಯಲೆಯ ಅನುಕಂಪವು ಅದನ್ನು ಕೊನೆಗೆ ಆನಂದದೊಳಗೆ ಸೆಳೆದುಕೊಳ್ಳುತ್ತದೆ.

ಸಂತೋಷವಾಗಿ ಅಲೆಗೆ ಶರಣಾದವನಿಗೆ ದರ್ಶನದ ಕ್ಷಣಮಾತ್ರವಲ್ಲದೆ, ಆತನ ಜೀವನವೇ ಆನಂದ ದರ್ಶನವಾಗುತ್ತದೆ. ತಿಳಿಯಿರಿ: ನಿಮ್ಮ ಪ್ರಜ್ಞೆಯು ವಿಶ್ವಶಕ್ತಿಯ ಆನಂದದ ಅಭಿವ್ಯಕ್ತತೆಯಾದ ಗುರುಗಳೆಡೆಗೆ ತಿರುಗಿದ ಯಾವುದೇ ಕ್ಷಣವಾದರೂ, ನಿಮಗೆ ಆನಂದ ದರ್ಶನವಾಗುತ್ತದೆ! ನೀವು ಗುರುಗಳ ಸನ್ನಿಧಿಯಲ್ಲಿ ಇರಬೇಕಾಗಿಯೂ ಇಲ್ಲ. ನಿಮ್ಮ ಪ್ರಜ್ಞೆಯನ್ನು ಆ ಚೈತನ್ಯದ ಅಭಿವ್ಯಕ್ತತೆಯ ಮೇಲೆ ಸತತವಾಗಿ ಇರಿಸಿದರೆ, ನಿಮ್ಮ ಜೀವನವೇ ಆನಂದ ದರ್ಶನವಾಗುತ್ತದೆ. ಬದಲಿಗೆ ಅದನ್ನು ವಿರೋಧಿಸುವವನು ಚೈತನ್ಯದೊಂದಿಗೆ ಐಕ್ಯವಾಗುವ ಸಂಭ್ರಮವನ್ನು ತಪ್ಪಿಸಿಕೊಳ್ಳುವವನಾದರೂ ಅಂತಿಮವಾಗಿ ಐಕ್ಯವಾಗುತ್ತಾನೆ.

ದರ್ಶನದ ಸಮಯದಲ್ಲಿ, ಗುರುಗಳಿಂದ ಅಪಾರ ಶಕ್ತಿಯು ಹೊರಸೂಸಲ್ಪಡುತ್ತದೆ. ಈ ಉಕ್ಕುತ್ತಿರುವ ಶಕ್ತಿಯನ್ನು ಸ್ವೀಕರಿಸುವುದು ಹೇಗೆ? ಮಗುವಿನಂತೆ, ತೀವ್ರವಾದ ಉತ್ಸಾಹದಿಂದ, ಒಂದು ಆಳವಾದ ಪ್ರಾರ್ಥನಾಭಾವದಿಂದ, ಒಂದು ಕರಗುವ ಹೃದಯದಿಂದ ಬನ್ನಿರಿ, ಅಷ್ಟು ಸಾಕು. ಸಮಾಜವು ಪ್ರಾರ್ಥನೆಯ ಶಕ್ತಿಯನ್ನು ನಾಶಪಡಿಸಿದೆ. ನೀವು ಬಯಸಿದಂತೆ ಆಗಲು ನಿಮ್ಮನ್ನು ಸಂಪೂರ್ಣವಾಗಿ ಪರಿವರ್ತಿಸುವ ಶಕ್ತಿ ಪ್ರಾರ್ಥನೆಗಿದೆ.

ಒಂದು ಸಣ್ಣ ಕಥೆ:

ಒಮ್ಮೆ ಒಬ್ಬ ಬಳಲಿದ ಯಾತ್ರಿಕನು ಒಂದು ಮರದಡಿಯಲ್ಲಿ ವಿಶ್ರಮಿಸಲು ನಿಶ್ಚಯಿಸಿದನು. ಅದು ಒಂದು ಕಲ್ಪತರು (ಬೇಡಿದ್ದನ್ನು ನೀಡುವ ಮರ) ವಾಗಿತ್ತು. ಅವನು ವಿಶ್ರಾಂತಿ ಪಡೆಯುತ್ತಿರುವಾಗಲೇ, ಅವನಿಗೆ ಒಂದು ಆಲೋಚನೆಯುಂಟಾಯಿತು, 'ನನಗೆ ಈಗ ಒಳ್ಳೆಯ ಆಹಾರ ದೊರೆತಿದ್ದರೆ, ಎಷ್ಟು ಚೆನ್ನಾಗಿರುತ್ತಿತ್ತು!' ಎಂದು. ಆ ಆಲೋಚನೆ ಬಂದೊಡನೆಯೇ, ಒಂದು ತಟ್ಟೆಯಲ್ಲಿ ರುಚಿಯಾದ ಆಹಾರವು ಆತನ ಮುಂದೆ ಬಂದಿತು. ಆತನಿಗೆ ಬಹಳ ಸಂತೋಷವಾಗಿ ತೃಪ್ತನಾಗಿ ಉಂಡನು.

ತೃಪ್ತಿಕರ ಊಟ ಮಾಡಿದ ಮೇಲೆ ಆತನು, 'ಮಲಗಲು ಒಂದು ಹಾಸಿಗೆ ಇದ್ದಿದ್ದರೆ ಚೆನ್ನಾಗಿರುತ್ತಿತ್ತು' ಎಂದು ಯೋಚಿಸಿದನು. ಆ ಕೂಡಲೆ ಒಂದು ದೊಡ್ಡ ಹಾಸಿಗೆ ಅವನೆದುರಿಗೆ ಪ್ರತ್ಯಕ್ಷವಾಯಿತು. ಅವನಿಗೆ ಅತ್ಯಾಶ್ಚರ್ಯವಾಯಿತು! ಅವನು ಹಾಸಿಗೆಯ ಮೇಲೆ ಮಲಗಿದನು.

ನಿಮ್ಮ ಆಸೆಗಳನ್ನು ಪೂರೈಸುವ ಮೊದಲು, ಅವುಗಳಿಗೆ ಸ್ಪಷ್ಟತೆಯನ್ನು ತರುವ ಅಗತ್ಯವಿದೆ. ನಿಮ್ಮ ಆಸೆಗಳನ್ನು ಒಬ್ಬ ಜ್ಞಾನಿಯೆದುರು ಮಾತುಗಳಿಂದ ಹೇಳಿದಾಗ, ಅವು ಅಪ್ರಯತ್ನವಾಗಿಯೇ ಸ್ಪಷ್ಟತೆಯನ್ನು ಪಡೆಯುತ್ತವೆ. ಆದ್ದರಿಂದಲೇ 'ಕಲ್ಪತರು' ಕಾರ್ಯಕ್ರಮದಲ್ಲಿ ನಿಮ್ಮ ಆಸೆಗಳನ್ನು ಮಾತುಗಳ ರೂಪದಲ್ಲಿ ನನಗೆ ಹೇಳಲು ಹೇಳುತ್ತೇನೆ. ನೀವು

ಹೇಳುತ್ತಿರುವಂತೆಯೇ, ಯಾವ ಆಸೆಗಳು ನಿಜವಾಗಿ ಪೂರೈಸಲ್ಪಡಬೇಕು, ಯಾವ ಆಸೆಗಳು ಪೂರೈಸುವ ಅಗತ್ಯವಿಲ್ಲವೆಂಬುದು ನಿಮಗೇ ತಿಳಿಯುತ್ತದೆ. ಅಭಿವ್ಯಕ್ತವಾದ ಚೈತನ್ಯದ ಬುದ್ಧಿಯು ಅಷ್ಟಿರುತ್ತದೆ.

ಕಲ್ಪತರು ದರ್ಶನವು ನಿಮ್ಮಲ್ಲಿ ಈ ಕೆಳಗಿನ ಬೀಜಗಳನ್ನು ಬಿತ್ತುತ್ತದೆ:

ಶಕ್ತಿ : ಬದಲಾಗಿಸಬೇಕಾದುದನ್ನು ಬದಲಾಯಿಸುವ ಶಕ್ತಿ

ಬುದ್ಧಿ : ಬದಲಾಯಿಸಲಾಗದುದನ್ನು ಒಪ್ಪಿಕೊಳ್ಳುವ ಬುದ್ಧಿ

ಭಕ್ತಿ : ಗುರುಗಳಲ್ಲಿ ನಿಶ್ಚಲ ಹಾಗೂ ಆಸರೆಯ ಶಕ್ತಿಗೆ ಉಕ್ಕುವ ಭಕ್ತಿ

ಮುಕ್ತಿ : ಈ ನಾಲ್ಕನ್ನೂ ನಿಮ್ಮ ಜೀವನದಲ್ಲಿ ಬದುಕುವುದೇ ಮುಕ್ತಿ!

ನಿಮ್ಮಿಂದ ಮಾಡಲಾಗುವ ಯಾವುದೇ ಕೆಲಸಗಳಿಗೆ ಶಕ್ತಿಯನ್ನು ಹರಿಸಿಲಿ. ನಿಮ್ಮಿಂದ ಬದಲಾಯಿಸಬಲ್ಲ ಸರಳವಾದುದನ್ನು ಮಾಡಲು ಯತ್ನಿಸಿರಿ. 'ನನ್ನಿಂದ ಎರಡು ಅಭ್ಯಾಸಗಳನ್ನು ಬದಲಾಯಿಸಲು ಸಾಧ್ಯ. ಮಿಕ್ಕ ಹತ್ತನ್ನು ಏನು ಮಾಡಲಿ?' ಎಂದು ಯೋಚಿಸದಿರಿ. ನಿಮ್ಮಿಂದ ಬದಲಾಯಿಸಲು ಸಾಧ್ಯವಾಗುವುದನ್ನು ಸುಮ್ಮನೆ ಬದಲಾಯಿಸಿ. ನಂತರ ಬದಲಾಗದುದನ್ನು ಒಪ್ಪಿಕೊಳ್ಳಿರಿ. ನಿಮ್ಮ ಚೈತನ್ಯವನ್ನು ವ್ಯಕ್ತಪಡಿಸಿದಾಗ, ನಿಮ್ಮ ಬುದ್ಧಿಯು ವಿಕಾಸವಾಗುತ್ತದೆ.

ನಿಮ್ಮಿಂದ ಬದಲಾಯಿಸಲು ಆಗದುದನ್ನು ಒಪ್ಪಿಕೊಳ್ಳುವುದೇ ಬುದ್ಧಿಶಕ್ತಿ. ಆದರೆ ನಿಮ್ಮಿಂದ ಬದಲಾಯಿಸಲು ಆಗುವುದನ್ನು ಬದಲಿಸುವ ಶಕ್ತಿಯನ್ನು ವ್ಯಕ್ತಪಡಿಸುವವರೆಗೂ, ನಿಮ್ಮಿಂದ ಬದಲಾಯಿಸಲಾಗದುದನ್ನು ಒಪ್ಪಿಕೊಳ್ಳುವ ಬುದ್ಧಿಯನ್ನು ಹೊಂದಲಾಗುವುದಿಲ್ಲ. ಮೊದಲು, ನಿಮ್ಮಿಂದ ಆಗುವುದನ್ನು ಬದಲಿಸಿರಿ. ನಂತರ ನಿಮ್ಮಿಂದಾಗದುದನ್ನು ಒಪ್ಪುವ ಒಂದು ಅಸಾಧಾರಣವಾದ ಸಾಮರ್ಥ್ಯವನ್ನು ನಿಮ್ಮಲ್ಲಿ ಕಾಣುತ್ತೀರಿ.

ನಾನು ಕೇವಲ ಒಂದು ಮಾತನ್ನು ಹೇಳಲು ಇಚ್ಛಿಸುತ್ತೇನೆ. ವಿಶ್ವಶಕ್ತಿಯು ನಿಮ್ಮ ತಂದೆಯ ಆಸ್ತಿಯಿದ್ದಂತೆ. ಅದನ್ನು ಆನಂದಿಸುವುದನ್ನು ಕಳೆದುಕೊಳ್ಳದಿರಿ! ವಿಶ್ವಶಕ್ತಿಗೆ ಸುಮ್ಮನೆ 'ಹೌದು' ಎನ್ನಿರಿ ಹಾಗೂ ಒಂದು ಮಗುವಿನಂತೆ ಅದರೊಳಗೆ ಪ್ರವೇಶಿಸಿರಿ.