ஞாபகச் சக்திக் கிடங்கின் மந்திரசாவி🔗

❖ 'விருப்பம்' என்னும் மந்திரச் சாவி
இருந்தால், ஞாபகம் என்னும் கிடங்கை
திறப்பது வெகுசுலபம்.

❖ படிப்பு ஒரு சுமை - படிப்பின் மீது
விருப்பம் உள்ளத்தில் மலராதவரை
இது உண்மை.

❖ படிப்பு ஒரு சுவை - படிப்பின் மீது
விருப்பம் உள்ளத்தில் மலர்ந்தபின்
உணரப்படும் உண்மை.

❖ படிப்பு ஒரு சுமை என்பதும், படிப்பு
ஒரு சுவை என்பதும் அவரவர்
விருப்பத்தின் அளவைப் பொறுத்தது.
உண்மையில் உங்களுடைய ஞாபக
சக்தியில் எந்த குறையும் இல்லை.

❖ மனித மனம்,
அது முதலில் கிரகிக்கும் கருத்துக்கள்
மற்றும் சம்பவங்களைக் கொண்டு
தன்னை உருவாக்கிக் கொள்கிறது.
அவற்றிற்குள் உறைந்து இறுகிப்போகிறது.
அது நல்லதானாலும், கெட்டதானாலும்!
வாழ்க்கையில் ஒரே மாதிரியான
சுக துக்கங்களையே மனிதன் தொடர்ந்து
அனுபவிக்க காரணமானது இந்த மனதின்
எலும்புகள்தான்.

❖ மனித உடலுக்கு எலும்புகள் போல்,
மனதிற்கு எண்ணங்கள்!
எண்ணங்களே இல்லையென்றால்
மனமே இல்லை.

❖ எண்ணங்களின் தொகுப்பே மனம்.
இதில் வேடிக்கை என்னவென்றால்,
எலும்புகள் வளைந்தோ,
நெளிந்தோ போய் விட்டால் மனிதன்
குட்டையாகவோ, கூனாகவோ
மாற வேண்டியதுதான்.
எண்ணும் விதம் களங்கப்பட்டதாகவோ
ஆனந்தத்திற்கு மாறானதாகவோ
இருந்தால்...
நம் மனமும் கூனாகவோ,
குருடாகவோ மாறிவிடும்.

❖ விதவிதமான எண்ணங்கள் மனிதனுக்குள்
சமுதாயத்திலும் உறவினர்களாலும்
திணிக்கப்படுகிறது.
எண்ணங்கள் சேரச் சேர
மனம் என்னும் குழந்தை
வளர ஆரம்பிக்கிறது.

❖ அவமானம் நேரும்போது...
பிரச்சினைகள் வரும்போது...
தவறு செய்யும்போது...
என்று படபடப்பு நமக்குள் ஏற்படும்
ஒவ்வொரு நிமிடமும் நாம் பீதியில்தான்
வாழ்கிறோம்.

❖ நமக்குள்ளே படபடப்பை உணர்வது,
பேச்சுத் தடுமாறுவது,
விரல்கள் நடுங்குவது...
இதில் ஏதாவது ஒன்று இருந்தாலும் சரி -
அந்த நேரங்களில் நாம் நம் கட்டுப்பாட்டை
இழக்கிறோம் என்று அர்த்தம்.
அதன் விளைவாக ஏற்படும் உயிர்ச் சக்தி
விரையம்தான் நடுக்கத்தையும்,
படபடப்பையும் உண்டு பண்ணுகிறது.

❖ இந்த பீதியிலிருந்து எப்படி
வெளிவருவது? எளிது,
பயத்தை கண்டு பயந்துவிடாமல்
பயமே பயப்படுமளவுக்கு
பயத்தை விழிப்புணர்வோடு
அணுக ஆரம்பியுங்கள்.

❖ பயத்தில் பயந்து படபடத்து,
பீதியடைவதற்கும்,
பயத்தை விழிப்புணர்வோடு பார்த்து
பீதியின் வெளிப்பாடான
படபடப்பையே தாண்டுவதற்கும்
நிறைய வித்தியாசங்கள் உண்டு.
சுருக்கமாகச் சொன்னால்...
பயத்தை தைரியத்தோடு எதிர்கொள்ளுங்கள்.
பிரச்சினை தீர்ந்தது.

❖ ஒரு சீடனால்,
குருவின் வார்த்தையை
அப்படியே நம்ப முடியும்.
குருவின் நேரத்தையோ, தன் நேரத்தையோ
சந்தேகங்களில் வீணடிக்க மாட்டான்.

❖ ஒரு பக்தனால்,
குருவின் வார்த்தைகளை
காது கொடுத்து கேட்க முடியும்.
ஆனால், நம்பி ஏற்றுக்கொள்ள நேரமாகும்.

❖ ஒரு பார்வையாளன்,
'இந்த குரு உண்மையிலேயே குருதானா!'
என்று சோதிப்பதிலேயே நேரத்தை வீணடித்து
விடுவான்.

❖ கடமை! கடமை!
என ஓடியதில்
பலரின் வாழ்வே
கடமைக்கென்று மாறிவிட்டது.
கடமைக்காக வாழ ஆரம்பித்துவிட்டார்கள்.
இது கொடுமை.

❖ கருணை ஒரு உற்சாகச் சக்தி.
கருணையின் வெளிப்பாடாகக் கடமை
அமைந்தால்தான்
வாழ்க்கை உற்சாகமாக இருக்கும்.
உற்சாகமாக வாழ முடியும்.

கட்டாயத்தின் பேரில் உந்தப்பட்டு
நம் உறவுகளுக்குச் சேவை செய்ய
இறங்கினால்
சேவை பூர்த்தியாகும்.
ஆனால் உங்களின் தனித்தேவை
பூர்த்தியாகாது.
ஆனந்தமே உங்களின் உண்மையான
தனித்தேவை.

❖ கருணையால் சேவை செய்தால்தான்
அது கடமை.
கட்டாயத்தால் சேவை செய்தால்
அது கடமை அல்ல அது மடமை.
உங்களின் சேவை கடமையா?
மடமையா?