செயலை நிறுத்து!🔗

நமது வாழ்வு முழுவதுமே, செய்தல், பெறுதல் என்ற இரு துருவங்களுக்கிடையில் ஊசலாடிக் கொண்டிருக்கிறது.

வாழ்வில் நாம் செலுத்தும் கவனம் எல்லாம், ‘செயல்’ பற்றியே. ஒரு செயலிலிருந்து இன்னொரு செயலுக்கு என நாம் ஓய்வில்லாமல் நகர்ந்து கொண்டே இருக்கிறோம்.

வாழ்க்கை முழுவதிலும், செய்தல், செய்தல் என ஏதாவதொன்றைச் செய்து கொண்டே இருக்கிறோம்.

நாம் வேலை செய்கிறோம், நாம் பேசுகிறோம், உறவினர்களிடம் உள்ள உறவை ஆழப்படுத்திக் கொள்கிறோம், நாம் நகர்கிறோம், நாம் திட்டமிடுகிறோம். உடளவிலும், மனதளவிலும், நாம் இடைவிடாமல் ஏதாவதொன்றைச் செய்து கொண்டே இருக்கிறோம்.

ஏதாவது பெற வேண்டும் என்பதற்காக.

மேலும் மேலும் உடைமைகளைச் சம்பாதிக்க நாம் முயன்று கொண்டே இருக்கிறோம். உடைமைகள், நம்மை மிக வலுவுள்ளவர்ாக்குகிறது.

அதனால் நாம் அதிகப் பணம், அதிக மரியாதை, அதிக நண்பர்கள், அதிகச் சான்றிதழ்கள், அதிக ஆரோக்கியம், அதிக அழகு, அதிக அறிவு எனப் பலவற்றையும் பெற முயற்சி செய்கிறோம்.

இந்தச் செயல்பாடுகளுக்கும், உடைமை கொள்ளுதலுக்கும், நடுவில் சிக்கிக்கொண்டு நாம் எப்படி இருக்க வேண்டும் என்பதையே நாம் மறந்து விட்டோம்.

செயல், உடைமை ஆகியவற்றைவிட, உண்மையில் முதன்மை பெற வேண்டியது ‘இருத்தல்தான்.’

ஆனால் அந்த மையத்தைத் தொட்டு மிக நீண்ட காலம் ஆகிவிட்டது நமக்கு.

‘நிறுத்து!’ - என்பதும் தந்திர சாஸ்திரத்திலிருந்து பெறப்பட்ட தியான நுணுக்கம். இதைப் பிரபலப்படுத்தியவர் குர்ட்ஜீயெஃப்.

(குறிப்பு ; வாகனங்கள் ஓட்டும்போதும, பளு தூக்கும்போதும், நீரில் இருக்கும்போதும் மற்றும் பொது இடங்களிலும் இந்தத் தியானத்தைச் செய்யக்கூடாது).

இந்தத் தியானம் எளிமையானது; நீங்கள் எதைச் செய்துக் கொண்டிருந்தாலும், நடுவில் அதைச் சட்டென நிறுத்துவது பற்றியது இந்த முறை!

சட்டென நிறுத்தப் போகிறோம் என்பது உங்களுக்குத் தெரிந்திருக்கக் கூடாது!

அதனால் நாள் முழுவதும் உங்களைக் கவனித்துக் கொண்டிருக்கிற யாராவது ஒருவர், உங்களது செயலின் நடுவே குறுக்கிட்டு, சட்டென, “நிறுத்து!” என்று உரக்கக்குரல் கொடுக்க வேண்டும், அவர்கள் விரும்பும் இடத்தில்! இது ஒருவகைச் சிலை விளையாட்டுப்போலத்தான்.

நீங்கள் நன்றாக ஆழ்ந்திருக்கும் செயலைச் சட்டென நிறுத்துவதால், அதிர்ச்சியும், மெளனமும் பெறுவீர்கள். அந்தக் கணப்பொழுதில்... நீங்கள் உங்களது ‘இருப்புக்குள்’ தூக்கி எறியப்படுவீர்கள்.