முன்னுரை🔗

✪ காதல் தோல்வியால் துறவியானீர்களா?
இல்லை, காதலில் ஜெயித்ததால்.

✪ யாரைக் காதலித்தீர்கள்?
என்னுள்ளிருக்கும் என்னை.

✪ உண்மைக் காதல் என்றால்?
பாசம், காமம், காதல், அன்பு, நட்பு இவையெல்லாவற்றையும் கடந்ததுமான விழிப்புணர்வே 'உண்மைக் காதல்'. அது உங்களுக்கும், உங்களுக்குமான ஊடுறுவல்!

✪ கடவுளை நிரூபிக்க என்ன ஆதாரம்?
கடவுளை நிரூபிக்க முடியாது என்பதே, கடவுள் இருப்பதற்கான ஆதாரம். சிறு உபகரணங்களால் நிரூபிக்கப்படும் அளவுக்குச் சிறியவர் அல்ல கடவுள்.

✪ பக்தி?
அது ஒரு முக்தி வழிச் சாலை.

✪ ஆத்திகவாதி என்பவர் பற்றி...
'கடவுள் உண்டு' என்ற வார்த்தையை உதிர்த்ததால் அவர் ஆத்திகவாதியாகிவிட முடியாது.

✪ நாத்திகவாதி பற்றி...
கடவுள் உண்டு என நம்புவது எளிது. கடவுள் இல்லை என நம்புவதற்கு இன்னும் கொஞ்சம் போராட வேண்டும். அவரது கொள்கை மேல் அளவுகடந்த பக்தி கொண்டவரே நாத்திகவாதி.

✪ 'பக்தி!' நாத்திகத்தில்... எப்படி ஒத்துவரும்?
பக்தி முக்கியம். பக்தி செய்யப்படும் பொருளை விட 'பக்தியுணர்வு' முக்கியமானது. பக்தியுணர்வு ஒரு மாபெரும் தியானம்.

✪ ஆன்மீகம்...?
ஆத்திகத்தின் உச்சமும், நாத்திகத்தின் உச்சமும் மோதிக் கொள்ளும் நாற்சந்தியே ஆன்மீகம். கடவுள் உண்டு, இல்லை என்ற இரண்டுக்கும் அப்பாற்பட்டதே ஆன்மீகம்.

✪ தியானம் ஆரோக்கியமான தூக்கத்தைத் தருமா?
தரும். நீருக்குள் விரலை விட்டு எவ்வளவு சுலபமாய் வெளியே எடுக்க முடிகிறதோ; அவ்வளவு சுலபமாக தியானம் செய்பவரால் தன்னுள் நுழைந்து, தூங்கி எளிதாய் வெளிவர முடியும்.

✪ எந்த குருவிடம் போகக் கூடாது?
'மற்ற குருமார்களிடம் போகாதீர்கள்' என்று சொல்லும் குருமார்களிடம்.

✪ மற்ற ஆன்மீக கூட்டங்களுக்குச் செல்லலாமா?
நிச்சயமாக!

✪ தியானம்?
ஞானத்தின் திறவுகோல்.

✪ ஞானம்?
தெய்வ மாளிகை.

✪ தெய்வம்?
சந்தேகமே வேண்டாம், நீங்களேதான்.

✪ யார் தியானம் செய்யக் கூடாது?
சிரிக்கும் குழந்தை. ஆனந்தமாயிருக்கும் ஞானி.

✪ எது சிறந்த தியானம்?
நிதானம். இதை தானம் அளியுங்கள்.
இதைப் பெறுவோரும், கொடுப்போரும்
புண்ணியவான்கள்.

✪ இன்றைய ஆன்மீகத்தை நம்பலாமா?
“நம்பாதீர்கள்”. தியானத்தை ஏற்றுக்
கொள்ளுங்கள். அது ஒன்றே போதும்.

இப்படிக்கு
நித்யானந்தத்தில்
ஆனந்த சேவக்.