சுகமான அவஸ்தை🔗

‘இதென்ன புது அவஸ்தை!
தானுண்டு
தன் கவலையுண்டு என்றிருந்தவனுக்கு’ - என
வினோதமாகக் கேட்டவனை
சாதாரணமாகப்
பார்த்த ஆன்மீகன்

‘தியான முகாம்
ஏதும் சென்று வந்தாயா?’
எனக் கேட்டான்.

‘எப்படி வாழவேண்டும் என எனக்கு
நேற்றுவரை தெரியாது என்பதையே
நேற்றுதான் தெரிந்து கொண்டேன்

கள்ளுண்டவன்
காலுங்கையும்
கல்லில் பட்டாலும்
முள்ளில் பட்டாலும்
கள் தெளியும்வரை
கவலையேயில்லை அவனுக்கு.

எப்படி வாழ்வதென
தெரியாதவரை
கவலைப்பட்டாலும்
துன்பப்பட்டாலும்
புத்தி தெரியும்வரை
பிரச்சினையேயில்லை எனக்கு.

வாழத் தெரியாமல்
கள்ளுண்டவன்
உடல் போல்
மந்தமாயிருந்த
மந்த மனம்
விழித்துக்கொண்டதே!

‘முதல் நாள்
முதல் அனுபவம்
இப்படித் தானிருக்கும்
அந்தச் சுகமான அவஸ்தை

என் உள் அசிங்கங்கள்
உணர்வுக் கண்ணாடியில் தெரிந்த போது
எனக்கும்
இப்படித்தானிருந்தது

தொடர்ந்து
செய்த தியானத்தால்
அவஸ்தை நீங்கியின்று
சுகமாயிருக்கிறேன்' - என்றான்.

‘நல்லவேளை
தியான முகாம் சென்றேனே
மிச்ச வாழ்க்கையாவது
மிச்சம் மீதி வைக்காது வாழ்வேனே' - என

நம்பிக்கைக் குரலில்
மலர்ந்த கண்களோடு
பார்த்துச் சொன்னான்
‘நன்றி!' என்று
புது ஆன்மீகன்.