எடுத்த காரியத்திலெல்லாம்🔗

"எடுத்த காரியத்திலெல்லாம் வெற்றி பெற முடியுமா?"

இது உங்களின் கேள்வியாக இருந்தால் அதற்கான பதில் முடியும் என்பதே.

"முடியுமா?!

எப்படி முடியும்?" என்று வியந்து கேட்டால், இந்தக் கட்டுரை உங்களுக்குத்தான்.

எடுத்த காரியத்திலெல்லாம் வெற்றி பெற, இந்த மூன்று பலத்தை ஒருவர் பெற்றால் போதும்.

இம்மூன்றில் ஒன்று குறைந்தாலும் எடுத்த காரியத்திலெல்லாம் வெற்றி பெற்றுவிட முடியாது.

பேராசிரியர் ஒருவர் ஜென் ஞானியிடம், "இதுவரை நான் ஆராய்ந்து பார்த்ததில், பலரின் எதிரிகள் அவர்களின் நண்பர்களாக இருந்தவர்களாகவே இருக்கிறார்கள். நெருங்கியவரே நெருப்பாகி விடுகின்றனர். ஏன்?" என்று கேட்டார்.

அதற்கு ஜென் ஞானி சொன்னார், "நீங்கள் ஒருவரிடம் உறவாட ஆரம்பித்த முதல் வினாடியிலிருந்தே, இரண்டே இரண்டு நிகழ்வு மட்டும்தான் நிகழ வாய்ப்பிருக்கிறது.

ஒன்று நண்பராகலாம், அல்லது எதிரியாகலாம்."

விருப்பத்திற்குரியவராகலாம் அல்லது வெறுப்புக்குரியவர் ஆகலாம். ஒவ்வொரு நொடியிலும் எது வேண்டுமானாலும் நிகழலாம்.

எந்த நொடியில் அலட்சியமாகின்றீர்களோ, அந்த நொடியில்தான் உங்களின் எதிரிகள் உருவாகின்றார்கள். நண்பர்கள்கூட எதிரியாவது அப்போதுதான்.

"அப்படியென்றால் யாரையுமே நம்ப முடியாதா?" என்று குடும்பஸ்தர் மிக வருத்தத்தோடு கேட்டார்.

ஜென் ஞானி சொன்னார். "ஞானியாகாத எல்லோருக்குள்ளும் அகங்காரம் இருந்தே தீரும். அது எந்த நேரத்தில் வேண்டுமானாலும் எப்படி வேண்டுமானாலும் வெடிக்கத் தயாராயிருக்கும்.

இதைப் புரிந்து, உணர்ந்து, பக்குவத்தோடு கையாண்டால் எதிரியைக்கூட நண்பராக்கிவிட முடியும்" என்று முடித்தார்.

ஜன பலத்தைச் சேர்ப்பது எப்படி?

மூளையிலேயே வாழ்வதுதான் எதிரிகளை உருவாக்கும். இதயத்தில் இறங்கி வாழ ஆரம்பித்தாலே எதிரிகள் உருவாவதை நிறுத்தி விடலாம்.

உங்களின் உணர்ச்சிகளுக்கு மட்டும் முக்கியத்துவம் தராமல், ஒவ்வொரு தனிமனிதனின் உணர்வுகளைக் கண்டுபிடித்து, அவர்களின் நல்ல உணர்வுகளை மட்டும் எழுப்பும் உணர்வோடு நீங்கள் பழக ஆரம்பித்தாலே... நீங்கள் மாறுவதற்கு முன் அவர்களே மாறிவிடுவார்கள்.

அன்பு, ஆதரவு, சின்னப் பாராட்டு, சிறு புகழ்ச்சி என்பன போன்ற சில உணர்வுகளைப் பெறத்தான், ஒவ்வொரு ஜீவனும் ஏங்குகின்றது. இதைத் தந்துவிட்டால், நீங்கள் தனி நபரல்ல. நீங்கள் ஒரு தனி சாம்ராஜ்யம்!

பண பலத்தை அதிகரிப்பது எப்படி?

குழப்பம், ஏக்கம், ஏமாற்றம், எரிச்சல் போன்ற உணர்வுகள் எதிலும் சிக்காமல் இருக்குமளவுக்கு உங்களைச் சுதந்திரப்படுத்தி வைத்துவிட்டால், நீங்கள் செல்வந்தர்தான்.

தெய்வபலத்தைச் சேர்ப்பது எப்படி?

இதற்கான பதில்தான் உங்களுக்கான இந்த ஆத்ம தியானம்.

தெய்வ பலத்தை மனிதனால் சேர்க்க இயலாது.

ஏனென்றால், அது ஏற்கனவே நம்மீது பொழிந்து கொண்டிருக்கிறது.

ஆற்றுக்குள் நீந்தித் திரியும் மீன் ஆற்றின் குளுமையை அனுபவிக்க, அது செய்ய வேண்டியது வேறொன்றுமில்லை. 'தான் ஆற்றில் தான் இருக்கின்றோம்' என்பதை உணர்ந்தாலே போதும்.

தெய்வ பலத்தை அனுபவிக்க ஆழ்ந்த நன்றி உணர்வோடு, தெய்வசக்தியோடும், குரு சக்தியோடும் உங்களை உணர்வுப்பூர்வமாக இணைத்துக்கொள்ளுங்கள்.

மாபெரும் இறைசக்தியில்தான் நீங்கள் இருக்கின்றீர்கள் என்பதை உணர்வுப்பூர்வமாகவும், பக்திப்பூர்வமாகவும் உணர ஆரம்பித்தால்... தெய்வ பலம் உங்களை வழிநடத்துவதையும், வழி காட்டுவதையும் கண்கூடாய் காண்பீர்கள்.

இது ஒரு மாபெரும் தியானம்.

செய்துபாருங்கள்.

பலம் புரியும்.