நான்காவது நாள்🔗

குணப்படுத்தும் சக்கரம் : அனாகதம்

சக்கரம் உள்ள இடம் : இதயப் பகுதி

சக்கரத்தைப் பூட்டுவன : தன்னைக் கவனிக்கச் சொல்வது

பூட்டைத் திறப்பது : சுயநலமற்ற அன்பு

தியானம் பெறப்பட்டது : திபெத்திய தந்திரத்திலிருந்து

காலம் : 30 நிமிடங்கள்

மகாமந்திர தியானம், மனத்தை ஸ்திரமாக்கி மையப்படுத்தும் தியானம். "மனஸ்யஸ்ய ஸ்திரா: இதி மந்த்ரஹ:'.

இந்தத் தியானத்தைச் செய்வதால், உங்கள் சக்தி முழுவதும் உங்களுக்குள்ளேயே மையம் கொண்டு விடுகிறது. உங்கள் உடல் முழுவதும் மந்திரமயம் ஆவதற்காகவே இந்த உத்தி உருவாக்கப்பட்டுள்ளது.

இது உங்களை 'அஜப' நிலைக்கு உயர்த்துகிறது - நீங்கள் ஜபிக்க வேண்டிய அவசியமே இல்லை. ஜபம் தானாகவே நிகழ்ந்து விடுகிறது. உடல் முழுவதுமே, இரும்பு முழுவதுமே ஜபம் ஆகிவிடுகிறது.

மந்திரங்களை உச்சாடனம் செய்ய வேண்டியதில்லை. இந்தத் தியானத்தில் மந்திரங்கள் உங்களை உச்சாடனம் செய்யும்.

சம்மணமிட்டபடி, ரைகைளை முழங்கால்கள் மேல் சின்முத்திரையில் வைத்தபடி, சௌகரியமாக அமர்ந்து கொள்ளுங்கள்.

கடிகாரம், நகை முதலியவற்றை அகற்றி விடுங்கள் அவை சக்திப் பெருக்கத்தைத் தடுக்கும்.

கண்களை மூடிக் கொள்ளுங்கள். உண்மையாகவே கண்களை மூடிக் கொள்ள வேண்டும்.

வழக்கமாக, நீங்கள் கண்களை மூடும்போது, வெளியிலுள்ள தொலைக்காட்சியை அணைத்துவிட்டு உள்ளே இருக்கும் தொலைக்காட்சியை ஆரம்பித்து விடுகிறீர்கள்.

வெறும் இமைகளை மூடினால் போதாது - கண்களை மூடை வேண்டும்!

இதற்கு ஒரு நல்ல வழியிருக்கிறது. ஒரு கணம், உங்கள் கருவிழிகள் கூழாங்கற்களைப்போல மாறி விட்டதாகக் கற்பனை செய்து கொள்ளுங்கள். உடனே உங்கள் எண்ணங்கள் நின்று விடும். அல்லது நிதானப்பட்டு விடும்.

இனி வாயை மூடியபடி, 'ம்ம்ம்....' என்று ஒலிக்க வேண்டும்.

'ம்ம்ம்...' மூலம் ஓர் அதிர்வை அதாவது நாதத்தை உருவாக்க வேண்டும். வேறு மந்திரங்கள் கூடாது. 'ஓம்' என்றும் உச்சரிக்கக் கூடாது.

முடிந்தவரை மெதுவாக ஒலிக்கவும். உடல் மெல்ல அசையட்டும். ஒலி, உங்கள் உந்திச் சுழியிலிருந்து அதாவது அடிவயிற்றிலிருந்து வர வேண்டும்.

உங்கள் உடலை ஒரு காலிப் பாத்திரமாக நினைத்துக் கொள்ளுங்கள். காலிப் பாத்திரத்தில் வாய் வைத்து 'ம்ம்ம்....' என்றால் என்ன ஒலி எழும்? அந்த ஒலியை உருவாக்குங்கள்.

இதனை முடிந்தவரை ஆழமாக, முடிந்தவரை அதிக நேரம் ஒலிக்கவும். இதில் முழு முயற்சியுடன் ஈடுபடவும்.

மகாமந்திர ஒலிநாடாவைப் பயன்படுத்தினால், உங்களின் ஒலிக்கு இசைவான இசையொன்று தொடர்ந்து ஒலிக்கும். ஒலிநாடா இல்லாதபோது, அமைதியான 'ம்ம்...' நாதத்தை ஒலிக்கவும். எந்தவிதமான மூச்சுக் கட்டுப்பாடும் செய்ய வேண்டாம். உங்கள் மூச்சு தானாக அதைச் செய்து கொண்டு விடும்.

இதுதான் 'மகாமந்திர உச்சாடனம்' - ஒலிக்கு அப்பாற்பட்ட ஒலி, மொழி கடந்த, எழுத்து கடந்த, பேச்சுக் கடந்த ஒலி இது.

இது 'அனாகதத் தொனி' (உருவாக்கப்பட முடியாத, கேட்கப்படாத ஒலி)- இந்த மகாமந்திரம் மிகமுக்கியமான அதிர்வு.

இது, உங்கள் இருப்பிற்குள் மட்டுமல்லாமல், பிரபஞ்சம் அனைத்திற்குள்ளும் ஒலி அதிர்வுகளை உண்டாக்க வல்லது.

இந்தத் தியானத்தின் ஆற்றலை நீங்கள் அனுபவிக்கும் போது, நீங்கள் அனாகதத் தொனியில் நிலை கொண்டு விட்டதைப் புரிந்து கொள்வீர்கள்.

எது நிகழ்ந்தாலும் சரி நிகழட்டும்.

கண்ணீர் பெருகினால் பெருகட்டும். சிரிப்போ, இருமலோ, நடுக்கமோ - எது வந்தாலும் வரட்டும். வர விடுங்கள்.

அது வெளியேறட்டும். எதையும் அடக்கிப் பிடித்து வைக்க வேண்டாம்.

எவ்வகை எண்ணங்கள் எழுந்தாலும், அவற்றை 'ம்ம்ம்...' மிற்குள் வீசி விடுங்கள். அவை மெல்ல மெல்லக் காணாமற் போய்விடும். 20 நிமிடங்கள் கழிந்த பிறகு, இசை நின்று விடும். மணிஓசை கேட்கும்.

சட்டென 'ஹம்மிங்கை' நிறுத்தி விடுங்கள்.

ஒரு பெரிய மௌனம் உங்கள் இருப்பைச் சூழ்ந்து கொள்ளும்.

ஒரு கணம் காலம் நின்றுவிடும்.

அந்த மௌனத்தைக் கவனியுங்கள்.

உங்களைச் சூழ்ந்துள்ள மாபெரும் அமைதியை அனுபவியுங்கள்.

சற்று நேரம் கழித்து, அந்த அமைதிக்குள் எண்ணங்கள் மெல்லப் பிரவேசிக்க ஆரம்பிக்கும். அவற்றை நிறுத்த வேண்டாம். அவற்றிற்குள்ளும் நீங்கள் பிரவேசிக்க வேண்டாம். சும்மா அந்த எண்ணங்களைக் கவனித்துக் கொண்டிருங்கள்.

விழிப்புணர்வின் மையமாக இருங்கள். உங்கள் அனாஹத நிலையில் அப்படியே இருங்கள். உங்களுக்குள் அமைதி மையம் கொண்டிருப்பத்தைக் காண்பீர்கள்.

இதை அதிகாலை வேளைகளில் செய்வதே சிறந்தது. இது எல்லையற்ற சக்தியை உங்கள் உடலுக்குள் உருவாக்கும். இரவில் செய்தால், அது உங்கள் உறக்கத்திற்கு இடையூறு விளைவிக்கக் கூடும்.